Jólin eru tími til að kyngja. Við kyngjum hamborgarhryggnum, brúnuðukartöflunum, majónesinu, konfektinu, frómasnum, fjölskylduboðunum, óþægilegu samverunni og erfiðu skoðununum á meðan snjónum kyngir niður.

Kyngja er fjórtánda jólabók Blekfjelagsins, örsagnasafn sem fylgir í fótspor fyrri verka en er einnig sérstæð í ritröð sem hefur verið árleg hefð síðan 2012. Áskorun ársins var að skrifa 87 orða sögu sem endurspeglar hugrænar tengingar höfunda við fyrirsögn bókarinnar og afraksturinn eru sautján fjölskrúðugar örsögur nemenda í ritlist á meistarastigi við Háskóla Íslands.